今日英皇2018年新人曾樂彤推出首張個人EP《#meme》，大眾對曾樂彤最感好奇莫過於由她原來的身分「YouTuber」轉變成歌手，今次EP名字《#meme》是網絡用語，有網絡爆紅事物的意思，不過《#meme》除說明了曾樂彤打從一開始就在網絡上引起關注的身分外，還有另一種含義，曾樂彤：「碟名拆開讀就由兩個 “me”組成，暗喻我唔止得一個面向，可能之前我做YouTuber到宜家做幕前俾人感覺有落差，咁究竟邊一個先係我呢？其實無答案，可能兩個都係呢！至於封套輯相，就玩同一個造型用兩種截然不同的感覺呈現，有跳脫，有嚴肅，又有無厘頭，但無論咩風格都係我。」講到今年先後推出三首作品，年尾再加推處女EP，佢就分享了少少心底話：「其實三首作品曲風都好唔同，一路嘗試各種可能，而過程中當然收到唔少評語，唱功方面自己會繼續落苦功去進步，但無咁易俾人打擊到自信心。」 今次封套的攝影師同為90後少女，曾樂彤話之前已經好仰慕其大名，合作時毫無代溝，拍封套時亦不特別緊張，唯獨大部姿勢都需要瞓地，連汗都唔留多滴，怕水腫所以連水都唔敢飲，但辛苦係有回報，曾樂彤：「我自問對影相係有要求，今次輯相淨睇螢幕已經滿意到可以直接出，唔駛修圖超厲害！當然造型師同美指都好大功勞，平時日常生活好難妝扮得咁誇張，會俾人當傻婆，但作為封套造型就好有力。」至於表情部分，除了典型chok樣外，攝影師仲特意捕捉曾樂彤未入狀態前的呆滯或大笑look，加埋插畫之後，古怪的配搭竟然零違和，完全切合佢認真地搞笑的本質。而當攝影師叫曾樂彤擺出自然的姿勢，無論著裙定著褲佢都毫無顧忌地擘腳，又或者單手做掌上壓，雖然令旁人摸不著頭腦，不過見佢份外投入確實娛樂到一班工作人員，大讚佢除左識影靚相，仲有本事駕馭「騎呢造型」，呢種喜感、百變同無包袱，將會係佢做娛樂圈一項強大的本錢。