7 個月前
由林峯、蔡卓妍、方中信主演嘅年度超級網劇《PTU機動部隊》上個禮拜正式首播後，即刻登上優酷站內熱播榜第一、貓眼資料榜第一、微博熱搜前二十等各大榜。而網民無論對劇情或者演員都有高度評價，特別係新演員曾樂彤，除咗網民，就連《PTU》導演何澍培亦對曾樂彤讚不絕口。
曾樂彤於劇中飾演護士方心怡，對中學同學林峯十分愛慕，而佢活潑開朗、熱情搞笑嘅性格亦立即吸引到唔少fans，網民紛紛留言話：「原本是為了林峯看的電視劇，沒想到居然見到這麼靚爆鏡的新面孔。」、「只想說一句，小姐姐演技超棒。」除咗網民fans，《PTU機動部隊》嘅導演何澍培亦喺自己微博點名讚曾樂彤做得好，「曾樂彤是很不錯的新演員從未學過表演，演員就是靠天份和悟性。」對於導演大讚佢有天份，曾樂彤話好開心，「套劇有咁多實力咁強嘅演員，能夠得到導演嘅讚賞，真係好開心，亦係一個好大鼓勵。」
另外，曾樂彤有份參與演出嘅香港電台劇集《彩虹交匯處-Miss Phoebe》獲得「美國國際電影及電視節」銀獎，日前舉得祝捷會。劇中曾樂彤飾演女主角Miss Phoebe，劇集獲得國際性獎項，身為演員一份子嘅曾樂彤當然高興，仲笑說好似自己攞獎咁開心，「其實自己對演戲方面一直都好有興趣，嚟緊會繼續努力，希望有更多好嘅作品同表現俾到大家。」
