謝霆鋒2019年第一首派台作品《塑造》（國語版《深淵》）今日正式推出。一直流住搖滾血嘅霆鋒今次仲藉歌向國際搖滾班霸「Linkin Park」主音Chester Bennington致敬。而今次霆鋒亦都搵嚟音樂唱作人王嘉爾（Jackson Wang）合作，將pop rock融俾搖滾。 霆鋒同Jackson因為拍攝《鋒味》結緣，《塑造》係二人喺音樂上嘅首次合作。新歌Rap嘅部份由Jackson親自填詞獻唱，獨特嘅Rap為成首作品為歌曲注人全新元素。 「隨意穿梭 像滿天的星火 別妄想可管我」、「Don‘t let them words control my path」喺新歌《塑造》入面，霆鋒同Jackson一齊用音樂道出一個無懼無悔、決不妥協嘅人生，今次霆鋒更喺音樂入面表達咗內心嗰團火。 《塑造》唔單止係一首音樂上嘅誠意之作，更值得聽眾去探索嘅，係其背後嘅創作誠意。《塑造》係一首向美國搖滾天團LinkinPark主音Chester Bennington致敬嘅作品。一直以嚟，LinkinPark喺世界樂壇，特別係搖滾界都佔據著非常重要嘅地位，同時亦係霆鋒非常鍾意嘅樂隊。2017年，樂隊主音Chester Bennington不幸離世，係樂壇上嘅一大損失，歌曲《塑造》因而誕生。《塑造》對霆鋒嚟講唔單止係音樂創作嘅高點，更加係對搖滾音樂產生極大影響力嘅音樂偉人嘅緬懷，所以歌曲旋律同曲風亦特別借鑒咗LinkinPark嘅音樂元素。除咗歌曲本身，背後嘅創作情懷亦足以令樂迷動容。

嚟緊將會喺佛山舉行三十周年巡迴演唱會嘅李克勤，日前獲邀出席第十四屆中國長春電影節閉幕式暨頒獎典禮。活動當日，克勤以一身深藍色暗花西裝look、並以紅襪作點綴驚喜亮相紅地氈，隨後喺台上演唱經典歌曲《紅日》，零瑕疵嘅live，就連台下嘅成龍、章子怡、徐崢同王珞丹等藝人都變成小fans，邊打拍子邊跟住唱，網友仲話佢哋係「史上最強打氣團」！ 另外，除咗忙住嚟緊嘅佛山演唱會，克勤仲積極籌備全新個人大碟，製作班底唔單止有國內知名音樂人，喺音樂創作上仲會加入全新嘅民族元素㖭。