早前，容祖兒推出新歌兼二十周年演唱會主題曲《Pretty Crazy》，歌曲MV同舞蹈編排均由韓國團隊一手包辦。身為祖兒嘅好友張敬軒亦都好有心，話要送份禮物俾祖兒賀一賀佢二十周年演唱會，於是就二次創作，化身「冤枉娛樂」新人「火龍果」，惡搞《Pretty Crazy》變《Pretty Hungry》，不過軒仔就冇飛去泡菜國拍，反而重點係玩佢至愛嘅「low cost cosplay」。 《Pretty Hungry》MV入面有四個造型，軒仔話佢最愛嘅係一套用膠袋堆砌而成嘅服裝，「雖然膠袋唔環保，但係我哋其實可以將佢廢物利用，好似呢套膠袋衫咁，造出嚟之後，其實真係靚㗎喎，我覺得呢套衫真係好出色。」除此之外，另一個零食造型係為軒仔度身訂造，原來因為唱片公司團隊同事覺得軒仔太為食，所以除咗將歌詞改為「Pretty Hungry」，更特登為佢做咗一個零食背囊，軒仔笑住話：「同事真係好有心，背囊上面全部都係我鍾意嘅零食，當中有我平時半夜直播食嘅，不過我覺得個背囊太靚啦，真係唔捨得食，所以決定之後將背囊送俾歌迷。」至於點解鍾意玩「low cost cosplay」？軒仔認為咁樣先係二次創作嘅精粹，「咁樣先體現出低成本製作出嚟嘅作品都有好嘅效果，同埋更加激發到創意。」 呢個MV一出，除咗吸引一眾網民，藝人泳兒、楊千嬅同鄭希怡等都紛紛留言，而經理人霍汶希（Mani）仲話：「真的跳得不錯。」睇嚟軒仔可以考慮轉型為跳唱歌手行列喎。至於被「致敬」嘅祖兒今朝就喺軒仔IG留言：「何方妖孽，唔好再搞我好朋友，我軒仔以前好乖巧㗎……唔好講咁多啦，一於攞筷子嚟夾佢啲手指，燒啲符水佢飲吧啦。」十分搞笑。

2001年《勁歌金曲》 陳奕迅、楊千嬅、容祖兒、陳曉東同屬玩得之人 當年為經典快歌二次創作舞步 既玩倒立又玩體操 甚至犧牲色相大露「腩肉」 忘我演出令人笑破肚皮 #傻人發現案 #大笑姑婆魔性笑聲 #有今生無來世的跳唱天團 #大熱 #黑夜的豹 #愛情陷阱