謝霆鋒帶隊掃街 林俊傑阿Sa冧唱《小酒窩》 之前九集嘅《鋒味》差唔多行勻咗半個地球，分別去過希臘、俄羅斯、捷克、柬埔寨等，而啱啱播出嘅第十集謝霆鋒就返番嚟自己主場－香港，佢帶住嘉賓林俊傑（JJ）去「掃街」，「我們就開心地玩、開心地吃。」 首先，霆鋒帶JJ去咗食盆菜，現場掛住喜慶嘅燈籠、熱鬧嘅廚房、坐滿人嘅圓枱，成個畫面勁有過年氣氛。見到呢個場景，JJ就即刻拎出霆鋒細個時，每年都會幫雜誌影新年相嘅全家福出嚟，見到呢啲相，霆鋒就好感概咁話：「不要被節日所限制，每天都是過節的感覺。」食完傳統嘅盆菜，霆鋒就帶JJ去食點心同埋香港另一地道「美食」，就係「掃街」，咖喱魚蛋、魚肉燒賣、碗仔翅、煎釀三寶等，食到JJ停唔到口，完全唔記得咗自己就嚟要開騷所以要戒口減肥，佢仲應承fans會曬腹肌，難怪佢自己都話：「我真的完蛋了！」 除咗帶JJ係咁食，霆鋒仲介紹自己「啲女朋友」俾JJ識，見到成間房都係霆鋒珍藏嘅結他，JJ當然興奮，霆鋒亦都分享每一支結他背後嘅故事，講吓講吓，佢哋兩個仲即興jam起歌上嚟，JJ話：「這次的《鋒味》之行很美好，跟一個對的人有共鳴。」 除此之外，霆鋒亦同JJ齊遊電車河，期間同JJ合唱歌曲《小酒窩》嘅阿Sa蔡卓妍驚喜現身，佢哋仲再次合唱《小酒窩》，JJ彈結他、霆鋒打住Cajon，大家齊齊分享音樂背後故事，分享美食分享愛。