新春團拜

2019年中央電視台春節聯歡晚會係中央電視台製作播出嘅大型綜藝文藝節目，曾被「健力士世界紀錄」認証為觀眾人數最多嘅節目，唔少兩岸三地嘅藝人都將視上「央視春晚」為演藝生涯嘅指標。噚晚（4日）年三十，容祖兒同陳偉霆（William）齊齊為「央視春晚」演出，祖兒更加係連續第七年出席。 當晩着住意國品牌FENDI紅色毛毛大褸嘅祖兒夠晒應節，節目上祖兒同林志炫、沙寶亮及涵子一齊演唱歌曲《媽，我回來啦》，並由祖兒打頭陣。由於國內好多年輕人都離鄉別井到大城市打工，佢哋趁春節都會回鄉探父母，表達子女對父母嘅愛，眾所週知祖兒同佢媽咪感情好好，所以祖兒亦唱得特別投入，祖兒話：「今年係連續第七年參與『央視春晚』，真係好榮幸好開心。每年年三十晚參與呢個晚會演出之後，真係有可以快啲返屋企見媽咪、同媽咪一齊過節嗰種感覺，所以唱得特別有感覺。」 另外，William則係第三年參與「春晚」，晚會上William孖住成龍、鄧倫一齊合唱《我奮鬥我幸福》，歌曲充滿正能量，William亦憑歌寄意，希望大家努力奮鬥、勇往直前。