1 個月前
琴姐李香琴今日(4日)傳出離世消息，享年88歲。
琴姐上世紀50年代；年僅14歲已經加入粵劇界，後來經關德興推薦加入影壇，先後拍攝過百部粵語片。琴姐擅長扮演刻薄壞女人，亦因而順理成章有「西宮琴」嘅外號。後來佢又同一共9位姊妹做老闆成立「香城電影公司」，到60年代末加入無綫電視。
琴姐多年嚟服務過無綫、麗的同亞視幾間唔同電視台，亦曾為《歡樂今宵》擔任主持，劇集演出亦數之不盡，其中2008年喺《溏心風暴之家好月圓》演嫲嫲一角，一句：「唔使驚，嫲嫲喺大廳」，最為人津津樂道。
琴姐50年曾經同粵劇老倌蕭仲坤結婚，不過婚姻只維持7年。雖然婚姻生活唔美滿，但係佢從影多年嚟，因為同演出角色大相逕庭嘅和藹性格，喺圈中人緣甚佳，除咗同好拍檔炳哥譚炳文傳足多年嘅緋聞之外，佢嘅契仔契女契孫更係多不勝數，周潤發、鄭裕玲、萬梓良、劉德華、鍾楚紅、張曼玉等巨星不在話下，新一輩好似林峯、陳法拉、黃宗澤都係叫琴姐一聲「嫲嫲」
2011年琴姐獲頒「萬千光輝演藝人」大獎，年事已高嘅琴姐亦逐漸引退，近年傳出因患上腦退化症而絕跡幕前，到今日璀璨70多年嘅演藝人生正式落幕。
(網上圖片)
