講到喺加拿大讀書進修，除咗多間出名嘅大學，其實仲有好多唔同選擇。子碩同埋凱晴，就喺卑詩省嘅列治文市 (Richmond)，搵到一間青年培訓中心。呢度最大特色，就係畀到當地唔同年齡、階層人士，由小朋友到後生仔女到成年人，發展佢地多元能力，例如鍾意做模特兒嘅，可以修讀模特兒課程，鍾意設計、甚至鍾意打機嘅朋友，又可以喺度學吓3D繪圖！而子碩同凱晴參觀校舍之餘，亦有機會同幾位同學傾過偈，了解過佢哋學習情況，感受到學校都畀到好多空間佢哋去發展興趣呀！

溫哥華地膽Wendy帶住Danny嚟Lougheed區，因為呢度好多又平又正嘅舖頭食肆，而且鄰近大學，所以非常受留學生歡迎！Wendy首先帶咗Danny去一間充滿青春氣息，以籃球名人做招徠嘅Cafe打卡食啲嘢；跟住就帶佢去睇吓當地學生們去邊度買平平地嘅生活雜貨，呢間舖頭，主打日本生活雜貨，裡面賣嘅貨品種類同款式都真係相當多，價錢亦都係學生afford得起，難怪Wendy同好多當地留學生都會嚟呢度掃貨啦… 店舖資料： OOMOMO Japan Living 地址：Lougheed Town Centre Unit 208 (D11)– 9855 Austin Ave, Burnaby, BC, V3J 1N4 電話：(604) 423-3375 網址：https://www.oomomostore.com/

後生仔去到溫哥華除咗欣賞當地特別嘅文化氣息，仲親身踏入Davie Street感受彩虹嘅氣息，據聞係歡迎唔同性取向人士居住㗎。而溫哥華地膽Steven仲帶阿楓去全球唯一一間有238種口味嘅雪糕店食雪糕！ 雪糕店地址： 1033 Venables St, Vancouver, BC V6A 3R9, Canada

溫哥華地膽Wendy，今次帶咗Sharlene同Danny去咗一個藝術Feel極重嘅社區 — Mount Pleasant！呢個地方，周街都見到好多又Chill又有型嘅塗鴉或者繪畫，打卡一流！當打卡打到攰，又可以去一間隱世Cafe歎個下午茶，呢間Cafe，裝修靚不特止，個Afternoon Tea Set，又大件又好味，絕對係女生嘅至愛呀~

講到喺溫哥華搵好嘢食，好多人都會推薦日本菜！所以地膽Manica就帶咗Sandy去試一餐極豐富嘅日本大餐，睇吓係咪真係講到傳說中咁正！海膽蟹肉壽司、火炙鵝肝壽司、扇背牛油果沙律、仲有特盛刺身併盤同特色紙火鍋…嗱，齋聽呢啲菜式就好吸引，到底味道係點，睇片聽吓佢哋嘅Comment嘞~ 店舖資料： 魚旨匠 地址： 8300 Capstan Way #1028, Richmond, BC V6X 4B7 Canada 營業時間：17：00 - 12：00 電話:  1 604-285-8882

兩位男生，先去室內小型賽車場鍊車，玩完見肚餓，Steven就帶咗阿楓去一間位於烈治文(Richmond)嘅牛肉麵店醫吓肚，呢間舖嘅牛肉麵除咗夠台灣地道，食品選擇亦非常多，兩位大食男生仲食到飽飽，絕對多謝Steven推介！ 店舖資料： 洪師父牛肉麵(列治文時代坊店) 地址： Unit 2800 Aberdeen Centre, 4151 Hazelbridge Way,Richmond,BC V6X 4J7 營業時間：11:00 a.m. ~ 9:00 p.m. 電話:  1 (604) 295-9357 網址：https://www.chefhungfoods.com/

又嚟到溫哥華地膽推介！今次Jeffery帶Danny去機場附近嘅一個特色彷飛機航道公園，原來係帶Danny嚟感受吓喺溫哥華Dating嘅感覺！可以喺彷真跑道抬頭望住飛機升降，仲有個巨型地球儀可以同另一半一齊環遊世界... 等等先，好似仲差一招必殺技：甜品！Jeffery就即刻介紹咗一間同樣位於Richmond嘅日式甜點店，入面有齊和菓子,麻糬,朱古力呢類甜點小食，如果買齊佢哋，做足準備再去公園打卡睇日落，出Pool成功率100%呀！ J.sweets 地址： 4151 Hazelbridge Way #2500, Richmond, BC 營業時間： (星期日至三)11:00 - 19:00 (星期四至六)11:00 - 2100 連結： https://jsweetsstore.com/

又嚟到溫哥華地膽推介！今次Carman 帶Sandy 去到Coquitlam去食oppa ? 哦唔係，原來係帶Sandy食一間自己平時去開嘅韓國餐廳，睇佢地叫到成枱都係，有炸雞、韓式粉粉絲等等。小編睇到流晒口水，勁想食埋一份！食到飽飽，再去埋睇秋天先可以睇到嘅三文魚回流，睇下三文魚媽媽點樣返到產地生BB，果然真係夠晒地道！

【地膽推介】嚟到溫哥華，除咗去啲熱門景點影相打卡，其實好多後生仔女都想體驗下當地人生活！所以地膽牛婷婷就帶咗台灣KOL小牛（牟韻潔），去佢平日最鍾意蒲嘅地點 — Main Street！喺Main Street呢度，有好多細細間、好有特式嘅咖啡店，當地人好鍾意趁住好天氣，買杯咖啡同Friend坐喺陽光樹蔭底下，傾吓偈放鬆下；傾到咁上下，又會隨處逛下唔同嘅小店，而婷婷就推介咗一間賣各類原材料嘅環保雜貨店，畀小牛睇吓溫哥華對環保重視嘅一面；跟住覺得心情好，婷婷又帶小牛去花店買紮花送畀自己，然後又繼續Hea遊…嘩，真係隔住個Mon都感受到當地生活有幾咁Chill、幾咁隨性呀！

後生仔去到溫哥華，飲飲食食同埋傾偈之外，點少得去一去當地最出名嘅大學 — University Of British Columbia（UBC）睇睇環境呀？因為聽講UBC校園唔止地方大，仲有好多好玩又非常Chill嘅地方，讀緊UBC嘅Carman，就帶住阿楓、Sharlene同埋Sandy走入校園，畀三位香港後生仔感受一下UBC環境同氣氛…嘩，睇到佢嘅介紹，真心羨慕，好葡萄呀！

呢間位於工業區，唔係好起眼嘅舖頭，原來係一間隱世朱古力甜品店！一入舖，已經聞到好香濃朱古力味，然後加拿大地膽Manica就推介Sharlene必定要試又靚又好味嘅Cream Puff，跟住再食埋舖頭好出名嘅朱古力…見到Sharlene食到好滿足嘅樣，都完全Feel到Manica嘅介紹係勁正呀！ BETA 5 地址： 413 Industrial Ave, Vancouver BC V6A 2P8 營業時間： 10:30 a.m. – 5:30 p.m. (Tue - Fri) 10:00 a.m. - 5:00 p.m. (Sat - Sun) 星期一休息 網址： https://shop.beta5chocolates.com/

香港後生仔女Sharlene同埋阿楓，又再充當半個地膽，搵搵有乜適合後生仔去玩！Sharlene作為後生女代表，就推介一間長龍店，呢度幾乎日日無時無刻都排長龍，排親閒閒地都45分鐘！為要試試係咪咁值得排，Sharlene堅持排足45分鐘等入座，一坐低，即刻試食餐廳最多人打卡菜式，到底好唔好食呢？至於後生仔代表阿楓，就去搵好多男生好想做，但唔係隨便做得到嘅實彈射擊！到底好唔好玩？刺唔刺激？阿楓眼界又準唔準呢？ Jam Café 地址： 2153 W 4th Ave, Vancouver BC V6K 1N7 營業時間：8:00 a.m. – 3:00 p.m. 網址： https://jamcafes.com/ DVC Indoor Shooting Center 地址： Unit #201-1655 Broadway Street, Port Coquitlam BC V3C 2M7 營業時間：5:00 p.m. – 10:00 p.m. (Tue) 2:00 p.m. – 10:00 p.m. (Wed – Fri) 12:00 noon – 8:00 p.m. (Sat) 12:00 noon – 6:00 p.m. (Sun) 星期一休息 網址： http://www.vancouvergunrange.ca/

除咗飲飲食食，溫哥華後生仔Ethan就帶咗香港嘅阿楓，去咗位於烈治文一間華人開辦嘅跆拳道學校參觀，因為據講呢間學校嘅創辦人，係教咗幾代溫哥華後生仔跆拳道架喇！難得見到師傅，Ethan同埋阿楓，都話要跟佢上吓堂，然後仲話要切磋下… Wu’s Taekwondo School (Canada, Richmond Taekwondo Association) 地址： #120 Fairchild Square, 4400 Hazelbridge Way, Richmond BC V6X 3R8 網址： http://www.wustaekwondo.com/

溫哥華後生仔Ethan戀愛經驗豐富，而且有好多追女仔秘訣，其中一樣殺手鐧，就係帶女仔去啲又靚又特別，啱晒打卡嘅餐廳，食住甜品浪漫一下！呢間位於烈治文嘅甜品火鍋餐廳，Ethan話好多女仔都必定鍾意，香港後生仔Danny去到之後，都完全同意呢間甜品舖係冧到女架！ Avery Cake Restaurant 地址： 112-4751 Garden City Road, Richmond, BC V6X 3M7 營業時間：11:00 a.m. - 10:00 p.m. (Mon - Sun, 逢星期二休息) 網址： https://www.facebook.com/averyrestaurant/

好多人話喺溫哥華住，一定要識揸車，其實都唔係，因為後生仔女，有好多都唔係好有錢，未必個個可以買車，但係坐公共交通工具，一樣可以好方便咁四圍去！香港後生仔阿楓就跟住當地一位冇揸車嘅大學生Wendy，學吓平平地搭Skytrain（天車），跟住再去一個環境舒服到爆公園，然後Wendy仲推介咗公園裡面一間佢認為係必去小店食好嘢，絕對係好介紹！ Rocky Point Ice Cream 地址： 2800 Murray Street, Port Moody BC V3H 1X2 營業時間：9:30 a.m. - 9:00 p.m. (Sun - Thur) 9:30 a.m. - 10:00 p.m. (Fri - Sat) 網址： https://rockypointicecream.com

去咗溫哥華兩個禮拜，跟當地後生仔玩得多，香港後生仔女都話自己已經變咗半個地膽，佢哋都有心水地方同各位推介！Danny就話有間平時要排半個鐘至有位嘅咖啡店，裡面嘅窩夫係勁好味，唔試唔得！而Sandy就搵到一間雪糕店，裡面賣嘅Whiskey Hazelnut雪糕，絕對係一試難忘！ Medina Café 地址： 780 Richards Street, Vancouver BC V6B 3A4 營業時間：8:00 a.m. - 3:00 p.m. (Mon- Fri) 9:00 a.m. - 3:00 p.m. (Sat - Sun) 網址： https://www.medinacafe.com/ Earnest Ice Cream 地址： 3992 Fraser Street, Vancouver BC V5V 4E4 營業時間：2:00 p.m. - 10:00 p.m. (Mon - Fri) 12:00 noon - 10 p.m. (Sat - Sun) 網址： http://earnesticecream.com/

打開各大網站，一Check溫哥華有乜玩，絕大部份都會介紹Granville Island市集同埋Fisherman Wharf（漁人碼頭），到底呢兩個介紹到爛嘅景點，係咪真係咁值得去？兩位喺當地生活咗好耐嘅後生仔女Carman同Leonard，就分別帶第一次踏足溫哥華嘅後生仔女Sharlene、Nina同埋阿楓去睇吓呢兩個地方，到底係咪真係非去不可！ Granville Island 地址： 1669 Johnston Street, Vancouver, BC V6H 3R9 開放時間：9:00 a.m. - 7:00 p.m. 網址： https://granvilleisland.com Fisherman’s Wharf (漁人碼頭) 地址： Steveston, BC Canada 備註： 區內有多間咖啡店、餐廳及特色店舖，開放時間各有不同，至於碼頭位置的漁船海鮮檔開放時間，亦要視乎天氣、季節和魚獲情況而定 網址： https://stevestonharbour.com/fishermans-wharf/