「黃金配角」廖啟智病逝 40年演活無數角色

有黃金配角之稱嘅資深演員廖啟智3月28號病逝，終年67歲。佢嘅經理人公司晚上向傳媒發稿確認消息。 「智叔」1979年投考第8屆無綫藝員訓練班入行，畢業後就隨即參演經典劇集《上海灘》扮演丁力嘅助手「陳祥貴」，之後多年來一直為多部經典劇集，好似《射鵰英雄傳之九陰真經》嘅周伯通、《包青天》當中嘅公孫策等數之不盡嘅作品演出重要角色，直至2015年佢最後一次為無綫演出《律政狂人》。 除咗正邪皆通之外，智叔亦為唔少節目擔任主持，好似《歡樂今宵》同後來嘅《城市追擊》等等，最令人有深刻印象可以話係佢曾經以高踭鞋踩鋼線表演。 智叔後期為唔同電視台演出過唔同作品，同時重心亦轉移向電影方面發展，亦先後憑《籠民》同《証人》兩度勇奪香港電影金像獎最佳男配角。佢亦因為舞台劇《秒速18米》嘅精湛演出獲香港舞台劇獎最佳男配角，亦憑舞台劇《愛存在》得到金碟獎最佳男演員，令佢喺行內有黃金配角美譽。 除此之外，智叔近年亦為浸會大學電影學院擔任講師同教學顧問，將自己多年經驗傳授予年青人。 智叔1987年同藝訓班同學 #陳敏兒結婚共組家庭，婚後育有3子，可惜幼子文諾2006年因癌症病逝，不過一家人一直堅強面對。 上周一(23號)傳出智叔患上胃癌一度病重，需全面停工養病，陳敏兒當時平靜向傳媒講解智叔病情，更指丈夫非常積極樂觀，正當大眾以為智叔病情穩定時，就突然傳出佢病逝消息，香港演藝界再痛失一位演技紮實嘅沉穩謙虛前輩。