早前,張敬軒獲邀成為京都念慈菴川貝枇杷膏代言人。一連兩條廣告片陸續見街。喺第一條電視廣告片入面,軒仔扮演行山友同埋自己個肺,一人分飾兩角,發揮佢搞笑兼扮嘢天份。 廣告一開始,「行山軒」被一個「小廢青」拖住隻腳,望多兩望,呢個人打機唔願瞓、由朝到晚開行冷氣吹住,搞到個人又乾又虚,仲成日吸埋啲廢氣,最後發現原來呢個人就係佢自己個肺!「阿肺」着住件彩色波點睡衣、bob頭加大眼鏡烏卒卒造型,淨係個look都娛樂性十足,再加埋軒仔七情上面嘅演技,難怪網民紛紛都話軒仔係被歌唱事業耽誤咗嘅諧星。至於第二條廣告片入面,軒仔繼續大放笑彈飾演「阿肺」,不過今次佢嘅主人晚晚煲劇又喊又盛,搞到「阿肺」喊晒口咁話搞到佢都傷晒,十分搞笑。 近年喺網絡同演唱會上,軒仔化身「降兩度」同「火龍果」成為網上熱話,扮嘢功力出神入化,今次拍廣告亦加入咗唔少扮嘢搞笑元素,「『念慈菴』呢個品牌相信香港冇人唔識,佢係一間老字號,但亦同時與時並進,能夠捉到時下流行元素放入廣告入面,所以我好鍾意今次廣告個概念,廣告除咗有搞笑效果,其實亦好配合到佢哋個產品。我仲可以想像到如果我有個仔,一定似足入邊個小廢青!」問到怕唔怕被定形為「諧星」,軒仔就話:「其實都係想透過唔同方法俾唔同年齡層嘅觀眾認識我、我嘅音樂同演技。」