早前以「踢館歌手」身份參加內地人氣歌唱比賽節目《歌手》而大獲好評嘅許靖韻(Angela),今日(5日)推出全新國語歌《原來我們都一樣》。 歌曲搵嚟林家謙作曲,原來因為佢睇過Angela參加內地選秀節目《創造101》入面,Angela唱Bruno Mars嘅《When I Was Your Man》而為佢度身訂造呢度歌,Angela話:「佢聽完之後覺得我之前未有過呢類型嘅歌,所以就寫咗呢首歌俾我。我一聽完就好鍾意,因為本身個demo全部都係佢自己彈琴,我好鍾意佢彈嘅琴,好好聽。」填詞方面搵嚟張楚翹,Angela之前亦有cover過佢嘅作品,一直想搵佢合作,「我一路都好鍾意佢,佢第一次寫呢份詞俾我嘅時候,我已經好滿意,冇嘢需要改。第一次同佢哋兩位合作,係非常非常之順利。」 歌詞唔駛改,不過原來歌名就改過,Angela話因為錄音時有感而發,所以變成而家呢個《原來我們都一樣》嘅歌名,「錄到最尾嗰take唱到呢一句,覺得真係好啱做歌名,所以就問:『可唔可以將呢一句變做歌名?』大家都覺得幾有feel,於是就好順理成章做咗歌名。」歌曲以「循環愛情」為主題,並非單純嘅失戀情歌,愛情其實係一條循環公式,從開始到終結;從快樂到痛苦。Angela提到當中歌詞:「『愛到不愛所以痛到不痛 所以沒甚麼好傷感』,感情開始嘅時候充滿希望,結束嘅時候係絕望,因為已經傷心到唔再痛。我覺得呢種愛情嘅循環好多人都經歷過,所以我哋大家愛情經嘅歷其實都係一樣。」 今日除咗推出新歌,亦都係Angela嘅生日,日前,佢啲fans已經喺灣仔地鐵站買燈箱廣告、又同連鎖台式飲品店製作生日杯套,除此之外,fans們亦都喺各大城市買咗超過一千五百塊廣告燈箱,慶祝Angela嘅生日,而Angela話生日出新歌,fans肯去聽、去share已經係一份好好嘅生日禮物,「音樂對於我嚟講係好重要,今日出歌,fans去share我首歌,就已經係一份好好嘅生日禮物。」問到生日點慶祝,Angela話同屋企人食餐飯就已經覺得好滿足,佢提到上一年嘅生日雖然冇得同屋企人過,但係都好難忘,「係喺《創造101》嘅宿舍過,豆子、我嘅roommate唱生日歌,喺自己宿舍間房入面玩歌劇,嗰晚玩得好開心。」雖然唔會特別慶祝,但Angela會買生日禮物俾自己,「生日嗰個月