生日除咗係偶像嘅大日子,同時亦都係fans嘅大日子。為咗令偶像有個難忘嘅生日,fans們都花盡心思為偶像慶祝。好似今個星期日(5日)就係歌手許靖韻(Angela)嘅生日,近年喺內地人氣愈嚟愈高嘅Angela吸納唔少fans,每次出席活動、表演或者網上投票,fans們都傾巢而出為Angela造勢,人氣勁盛。 今年生日,佢嘅fans就喺全國四個直轄市、十九個省及三十六個地級市,買咗超過一千五百個嘅「豐巢」Led Mon,連續七日播放對Angela嘅生日祝福。除咗內地,香港亦有行動,fans喺灣仔地鐵站亦都買咗燈箱廣告,另外又同連鎖台式飲品店合作製作生日杯套,到咗Angela嘅生日周,無論喺香港定國內都會見到佢嘅蹤影,認真威水!除此之外,歌迷仲好有善心,佢哋用咗Angela嘅名義做咗兩個公益活動,令Angela嘅生日過得更有意義。 歌迷咁有心,Angela當然開心,咁嘅形式去慶祝係第一次 ,「入行後歌迷都會送禮物俾我 ,但其實唔想佢哋咁嘥錢,因為好多都仲係學生讀緊書。有時大家傾吓偈,講吓近況,都已經好開心。今次買燈箱廣告去慶祝真係第一次,冇諗過,好驚喜好開心,佢哋仲用我個名去做慈善,真係好有愛。知道歌迷真係好錫我,所以我要更加努力,創作多啲好嘅作品回報番佢哋。」