上個月,容祖兒壓軸現身「KKBOX香港風雲榜」首唱新歌《Pretty Crazy》,等大家先睹為快。今日(4日)2019年第二主打歌派台喇。由黃偉文填詞,歌曲製作、排舞以致MV拍攝都係由韓國團隊主理,實行嚟一個文化交流大衝激。 一向有留意KPOP嘅祖兒話今次可以同韓國製作團隊合作係一次新鮮嘅嘗試,「韓國團隊將佢哋好熟悉或者喺市場上好流行音樂元素設計喺歌曲內,係精彩嘅!」而「Pretty Crazy」的題材靈感嚟填詞人黃偉文,「好多時候啲人會講:『別人笑我太瘋癲 我笑他人看不穿』就係我哋呢一種人啦。」祖兒笑說:「我覺得阿Y(黃偉文)唔係寫緊我,因為我唔係crazy,不過pretty囉,哈哈,不過喺好多朋友心目中,我應該係幾crazy嘅。《Pretty Crazy》喺嚟緊嘅演唱會裏面一首比較重頭戲嘅作品。」歌詞提到「平庸時代 妒忌你 要你正常」,就正如好多偉人變成一個叱咤風雲嘅英雄之前,大家都會覺得佢哋係瘋子,所以我成日都覺得一個真正嘅偉人係經得起時間嘅考驗。」 歌曲MV於韓國拍攝,舞蹈編排亦由香港排到去韓國,舞蹈當然充滿「泡菜味」,「動作可能看似唔係太複雜,但其實身體上嘅協調性、節拍感嘅捕捉,總之個節奏快慢嘅dynamic,係非常之吸引。」祖兒在MV入面總共換咗七個造型,每換一個造型都要換上唔同嘅妝容同髮型,而拍攝時間由最初的十二小時延長到二十小時,難怪祖兒話係一個好大嘅挑戰。另外,導演亦設計咗多個場景拍攝,包括:羅馬雲石宮殿、以鏡子折射打造出infinity視覺效果嘅鏡箱等。除此之外,MV更加入以多個CCTV所砌成嘅道具燈、電單車頭盔等古靈精怪元素,令畫面看上更配合歌曲主題。 今年八月將會舉行演唱會嘅祖兒已經開始努力健身,雖然韓國有好多美食,但佢都好自律咁冇亂喪食,祖兒話:「呢五日偉大嘅拍攝工作,啱啱好喺演唱會之前warm up番成個人、撻着番個摩打。」