洪卓立(Ken)日前現身廣州記者招待會,宣佈嚟緊6月15號會喺佛山南海體育館開演唱會,過百Fans收到風已一早嚟到撐場。記者會開始時,當Ken一現身,現場fans立刻尖叫聲不斷,相當熱情! 喺廣東地區相當有人氣嘅Ken宣布於佛山開show嘅消息,Fans都相當開心,話想聽到《彌敦道》、《少年遊記》、《三腳貓》、《獻醜》等經典歌曲,仲話已經做好搶飛準備,最貴票價嘅飛日前一開賣已經火速售罄!其實上年十二月Ken已經喺廣州體育館舉行處男show,當晚三千人場館全場爆滿,觀眾情緒高漲、氣氛熱鬧,所以今次乘勢追擊,六月喺佛山再開演唱會。Ken喺記招透露今次佛山站將會演唱更多自己嘅作品,彌補廣州站嘅遺憾。佢仲話而家會開始養靚把聲,用最好嘅狀態演出,希望令一班Fans樂而忘返。 今次舉行演唱會嘅場館比上次容納多一千人,Ken直言有啲緊張:「多一千個位,都有啲壓力,不過上次Fans反應好好,所以今次都有信心,希望大家多多支持!」至於上次Ken被演唱會導演指佢太多口水掛住講嘢,所以今次佢話自己會準備更多歌,但仍然會同Fans互動。Ken近日Keep住健身,唔少Fans都期待佢演唱會上晒肌,Ken話要保持神秘,笑說:「睇吓到時操成點先啦,又或者到時即興除都唔定㗎,又或者到時淨係得兩條手臂見得人呢。」