入行廿週年,容祖兒今年將於八月假紅館舉行〈萬通保險PRETTY CRAZY 容祖兒演唱會〉,早前祖兒就特別為演唱會宣傳海報飛去東京,非常設合演唱會主題,Crazy地用24小時努力超額完成。 祖兒謂演唱會名字PRETTY CRAZY 是好朋友黃偉文為她定的,「個名真係起得好好,因為呢二十年來無論係工作上、不同經歷上面,一路走來都真係PRETTY CRAZY o既!, PRETTY CRAZY呢兩個字,既可以代表到我地對工作上面的 CRAZY,又可以代表到我地一直努力追求o既優雅,簡簡單單兩個字形容左我呢二十年,Wyman真係勁。」 今次演唱會海報,係搵番祖兒初入行20歲第一次開紅館演唱會合作過的國際知名攝影師Leslie kee 紀嘉良合作,祖兒謂 : 「呢個合作,又係有齊PRETTY CRAZY元素!其實係去年東京睇明哥(黃耀明)演唱會個陣,突然諗起Leslie kee 紀嘉良,就即刻約左佢出來半小時,一個下午茶咁就已經定左係今年一月份影呢輯相。因為大家工作時間關係,我只係用左一日飛去東京,24小時crazy完成呢次海報。影左好似有超過12個鐘咁內,一落機就去影相,影完就上機走。所有衫呀,形像設計,都係Leslie kee 紀嘉良一手包辦,佢細緻到每套衫都要我換埋指甲襯色,真係未試過咁影法。但係完成作品,當然係very pretty啦,影左好多套衫,多到返來香港,剩係揀相都揀左好內,張張都咁好,唔知點揀。最後經過公司所有同事投票,最終好開心揀左我最鐘意個一張用先。之後大家重可能睇到好多唔同款海報。」 今次是二十週年紀念演唱會,祖兒話諗番起當初二十歲第一次係紅館的感覺真係好crazy,當時佢係唔相信會有人來睇自己演唱會,「咁二十年後今次,係我第十個紅館演唱會啦,crazy就交比歌迷同觀眾啦,我就負責pretty啦!話就話八月先係演唱會,但係我已經開始準備緊架啦,keep好自己身體啦,準備最佳狀態,唱最好o既歌,跳最正o既舞比大家睇 ,我希望今次唔好咁瘦,因為累積多年經驗,我發覺做演唱會最緊要係體力同健康,太瘦就冇營養又唔夠抵抗力去戰鬥,所以keep fit 同調理身體係會同步進行,唔會比自己病。」