預產期喺今個月嘅何嘉莉(Lillian),呢兩日喺IG出post同一對仔女齊齊做產前紓展運動、又瘋狂食麥記又盛,不過原來B女喺前日晏晝(7日)已經出咗世啦。 已育有一子一女嘅Lillian之前兩胎都係開刀生產,所以今次都係選擇剖腹生B,雖然之前有兩次經驗,但係今次入手術室前Lillian都係好緊張!「御貨」過程順利,機師老公Gerald都有入產房剪臍帶,Lillian話:「BB重6.9磅,暫時都未睇得出似邊個。」屋企多咗個小公主,一對仔女都好心急要見吓小妹妹,「阿仔見到BB好興奮,今次我冇代送禮物俾哥哥姐姐,之前囡囡出世就有送禮物俾哥哥,但今次我就話將個BB送咗俾佢哋,就係最好嘅禮物,佢哋都不知幾開心。」問到BB改咗名未,Lillian就話已經改咗英名文,叫Raina,「係拉丁名,代表皇后意思。雖然佢係屋企入面最細,但我哋會當佢好似女皇一樣,萬千寵愛。 」孻女孻心肝,呢個一家五口大家庭,一定錫到Raina燶。