李克勤剛剛完成美國及東莞巡迴演唱會回來,兩星期內馬不停蹄加時差,令到一向捱得的他都大叫疲累,終於要喊停休息兩日。 克勤謂先是去美國巡迴演出,回來後沒有休息就已經即排練,再上東莞開騷,期間還在東莞綵排後去另一個地方商演,再返東莞,自己也覺得有點瘋癲,在東莞綵非完吊威也,高空中不停打轉後,開始不停想嘔,「平日轉完休息一會已經冇事,係東莞應該個人太累了,吊完落來一直作嘔,晚飯都食唔落。幾驚以為係作感冒,你知啦做騷最忌病,好彩休息左一晚第日就冇事。」 東莞的演唱會,他找來認識三十年老友關淑怡做嘉賓,雖然天氣未回暖,但關淑怡一出場就令全場熱度加溫,克勤笑言自己也比關小姐嚇一嚇,「冇諗過佢對觀眾咁好呀,咁性感行出來,哈哈!我即刻同佢講,我唔敢亂望呀!我怕比老婆鬧,我只得盡量望你個頭頂啦!」關淑怡就笑道,「你唔好咁啦。。。哈,我盡量咁唱啦。」然後用克勤送給她的花擋著件超底胸衫,以作配合。  克勤又謂,好內冇見這位老友,知道對方最近簽了環球唱片,事業又再從新出發,都戥對方開心,希望佢快d有新歌有好作品比歌迷聽。 之前美國巡唱,克勤的大隊遇上大風雪,樂隊及工作人員,坐了二十多小時車才到RENO演出場地,觀眾平均都坐近十多小時車才到達。克勤謂自己因為先去了洛杉機買結他,所以避過一劫,轉飛機過去RENO,不用於漫天風雪下捱長途車,但見工作人員及觀眾,全部捱風雪來,心裡很是感動,唱歌唱到一半竟忍不住被感動落淚,要從起音樂重唱。「我以為個騷得我一半或者少過一半人架啦,邊個會咁大風雪重來睇騷?點知全部到晒!你諗下有人肯為左聽你唱歌,坐十幾二十個鐘車,冒住風雪來,個一刻真係好感動。人到都已經開心啦,班歌迷重有銀紙花,又利是咁,見到D幾十歲大男人,重拿住燈牌衝上前點唱又同我大合唱,我真心好感謝。」 接下來克勤謂計劃中會到武漢及江門繼續巡迴,另外最新國語唱片也快將開工。