有近7年冇出席公開活動嘅前港姐李珊珊,雖然佢少露面,但間唔中都有啲佢嘅新聞,當中最令人關注當然係珊珊嘅健康情況,因曾有傳佢個腦生瘤! 不過珊珊今晚為慈善現身公開活動,佢參與一個喺灣仔舉行嘅慈善音樂會,雖然有一段時間冇見,但珊珊今晚精神唔錯,依舊一頭長髮,面容有少少浮腫,但一樣省鏡,珊珊喺台上介紹東華三院醫療服務外,仲分享個人感受。 珊珊以神秘嘉賓第一個上台,佢話:「本來有份稿,但我唔想攞住講喎。」跟住佢就分享個人感受,過程見珊珊好似有啲氣喘同有啲緊張,講到某部份仲「食螺絲」,但最後順利完成,台下全場掌聲。 而主席王賢誌話同珊珊多年老友,知道佢曾經有段時間健康較差,而早前《歡樂滿東華》已想揾佢幫手,但當時珊珊話自己未準備好,所以拒絕咗,不過珊珊知今晚呢個音樂會,係王賢誌缷任前最後一個活動,結果佢就自薦話要參加出一分力。