雖然我有排都未算成功,仍然努力中,但係我覺得要成為一個成功人士,背後必須要有一個小團隊,當中一定包括一個專業會計師。 上次介紹咗嗰位上唇有粒墨兼好有責任心嘅保險agent Olive,今次到呢位斯斯文文、怕怕羞羞、但係非常專業嘅周柏豪頭會計師 - William。 啱啱出嚟工作,所有嘅嘢都係自己搞,到認識我老婆,佢慢慢開始幫我處理我嘅事務,喺大約七八年前,二家姐熹熹出世之後,自己嘅工作開始越嚟越忙,我老婆比我更忙,我哋發覺要搵一個專業人士去幫手去處理我哋個人及家庭財務等等又複雜又煩到癲嘅事,因此,透過朋友介紹認識咗呢位四眼仔。 咁到底佢有d咩好? 每次有嘢問佢,無論個問題幾高深定幾無聊,即覆兼即刻答到你;所有佢幫手準備同處理嘅文件,全部解釋得清清楚楚、有條有理非常有交帶;你完全唔需要嘥時間舟車勞頓去佢公司搵佢,一個短訊、一個電話,佢會九秒九上到你屋企搵你交收;原則上你俾齊d料佢之後乜都唔駛做,到時到候佢就會自動搵你,又係九秒九拎晒所有嘢上你屋企,你簽幾個名就搞掂;就算唔喺佢工作範圍入面嘅事,你有需要佢都會用佢嘅人脈同關係幫你解決同俾意見你;而最正嘅係,做晒上面所有嘅嘢,佢嘅收費係非常合理同貼地兼服務態度100分。 其實過去呢幾年間中都有介紹佢俾身邊嘅朋友,我冇問返佢哋對 William 嘅 feedback 係點,但係我知個個第一年幫襯完佢,之後都會繼續 keep 住搵佢幫手,直到而家都係。 過年前佢又去我屋企攞d文件,順便搵我同老婆開個小會,回顧一下舊年同傾傾今年嘅財政狀況同建議,臨走之前我問佢成日撲嚟撲去,有冇諗過調整一下d收費,唔駛做得咁辛苦呢?佢好謙虛咁答我:「我呢d公司仔,有得做已經好好㗎喇,收平d,留住個客,細水長流咪仲好!」 因為你呢句,加上你一直以嚟嘅工作態度,呢篇嘢,我覺得係對你嘅一份心意。 各位,有需要嘅,PM我!