《鋒味》日前播出第十一集,今集謝霆鋒同內地藝人白宇去到西安搵食。由於白宇係西安人,所以今次佢反客為主做導遊,除咗帶霆鋒周圍飲飲食食,仲搶埋霆鋒飯碗變身「大廚」,炮製咗個「暗黑料理」俾真正嘅大廚Chef Nic嘆。一集一個故事,今次霆鋒就為旅遊巴售票員下廚,多謝佢哋喺平凡崗位上辛勤嘅付出。 話明係反客為主,白宇一出場就化身導遊,由於秦朝曾定都西安,所以白宇就話想霆鋒嚟到要有「一見鍾秦」嘅感覺。見到霆鋒,白宇就自爆話細細個就好鍾意霆鋒,仲話對佢嘅歌滾瓜爛熟。去到大秦文化飯店,霆鋒同白宇一齊換上套古裝,穿越成為古代人,仲互相鞠躬行禮,十分搞笑,之後白宇就開始滔滔不絕咁講解美食背後嘅故事,邊食邊聽故仔嘅霆鋒話:「講解讓食物吃起來更美味。」喺白宇嘅帶團下,霆鋒亦都食咗去到西安一定試嘅「饃夾肉」同「粉湯羊血」,除此之外,白宇仲教霆鋒陝西話,霆鋒更加活學活用,即席喺麵館大派用場。之後,白宇就開始為霆鋒下廚,佢用油潑辣子、醪糟、酸奶、士多啤梨肉整成雪糕,食材組合「騎呢」,食到霆鋒好矛盾,「一會很怪、但一會又覺得很好吃。」 每一集《鋒味》霆鋒都會去到當地人屋企為佢哋煮餐飯,今次佢哋就去到旅遊巴售票員嘅屋企。下廚前,霆鋒同白宇搭旅遊專線同售票員見面,短短幾分鐘時間,售票員深入淺出講起西安文化,令霆鋒讚嘆:「他那份對自己職業的熱愛,很讓人感動。」正值新年,霆鋒為售票員一家人準備咗新年菜式:融入‪西安嘅味道‬,寓意風生水起嘅「撈起」,一家人圍埋食團年飯,令家味、年味、團圓味交織喺今集嘅《鋒味》。