早前,吳浩康‌(Deep)喺澳門百老匯舞台舉行佢首個澳門演唱會《Deep Night Show - One Night in Macau 2019》,當晚全場爆滿,亦有好多Deep嘅朋友、長輩同埋fans都專登由香港到澳門睇show,Deep嘅爸爸亦有到場支持,Deep一見到爸爸即刻喊到變豬頭,場面感人。 兩個鐘嘅show入面,Deep唱咗廿二首歌,大晒唱功,多首代表作《討厭》、《洗剪吹》、《攞日失戀》及《先入為主》都掀起高潮,全場觀眾同Deep大合唱。第一次澳門開show,Deep話既緊張又開心,「show前都幾緊張,因為自己狀態比較唔係好穩定。因為澳門同香港真係好近,文化資訊亦都好相似,成日都覺得除咗香港,澳門係我第二個基地,所以可以喺澳門開show,對我自己嚟講係一件好有意義嘅事。」 唱到《兒戲》時,Deep好感觸咁話:「有好大段時間唱歌範圍只係喺自己屋企,但我永遠都有一個最好嘅觀眾,永遠都有一個人生最好嘅夥伴、對我最大嘅包容,冇佢根本冇我,我爸爸!」之後Deep走落台攬實爸爸,仲喊起上嚟,事後Deep話:「爸爸去澳門支持我,好感動。show前我有啲將我嘅壓力轉嫁咗喺我爸爸到,所以喺show上見到佢,好百感交集。」 除此之外,show上亦發生咗蝦碌事,就係台上字幕機出錯歌詞,「唔知係部機器定係電腦定係電線有問題,因為同我合作開嘅副導演係負責幫我㩒Led字幕,其實睇字幕係一個壞習慣,係唔應該睇,但係個字幕不停轉錯歌詞,我唱緊下一句時,字幕再播再下一句、或者播番上一句,係好難唔俾佢影響到,哈哈,不過係幾隻歌係咁啫,其實做show好多時都有啲咁嘅小意外,好似考試、考牌咁,考記憶力、考應變、心態、唱歌,但係每一次考試都好開心,因為有好熱烈嘅掌聲,好多謝觀眾。」而當晚Deep亦請嚟入行前就已經成日合作嘅小肥做嘉賓,二人互唱對方經典歌,Deep話:「小肥未喺香港出道前我哋已經有合作,《感覺蘇豪》嘅英文部份、《擇日失戀》入面嘅和音,其實都係小肥,好多謝佢一直以嚟對我嘅support,呢個人真係好有義氣,佢嘅唱功、唱歌風格我亦好欣賞、好鍾意,所以好想將啲好嘢同大家分享。」