今日(24日)容祖兒推出全新廣東歌《一種永遠》。從1999到2019整整20個年頭,今年喺特別值得紀念嘅一年,祖兒希望以嶄新嘅作品,迎接下半年舉行嘅20週年演唱會。 作為2019年第一首主打歌,歌詞內容令祖兒回想起堅持咗20年夢想嘅心路歷程。長時間處於同一種工作環境、同一種態度,去追尋自己理想同目標,要保持呢份毅力同決心並非容易,呢首歌對祖兒嚟講絕對係代表現階段自己心態嘅一首音樂作品。 除此之外,歌曲喺製作期間亦都發生咗一件「堅持」嘅趣事。一首以「Output1-2」(軟件自動默認嘅檔案名)為名嘅DEMO,放咗喺監製舒文嘅工作室多年,由於冇任何創作人資料,冇辦法開始下一步嘅創作,雖然一直有搵DEMO擁有人,不過一直搵唔到,諗住放棄嘅時候,奇蹟就發生。祖兒諗住搵舒文合作新歌,舒文覺得嗰首冇人認領嘅「Output1-2」無論曲風、編曲都好啱祖兒2019年嘅序幕曲,二人一拍即合。除咗舒文,編曲亦都搵嚟為華語電影《七月與安生》及曾為多套香港電影配樂嘅日裔音樂人波多野裕擔任。歌曲亦令祖兒回憶起過往音樂旅程嘅各種階段,佢仲藉住自身經歷向追夢者勉勵,只要堅信保持熱情堅持落去,就有奇蹟發生。