謝霆鋒腳底按摩冇反應 張鈞甯:「你面部神經壞了。」 最新一集嘅《鋒味》謝霆鋒搵嚟台灣女藝人張鈞甯做嘉賓,仲去到張鈞甯主場台北。去到台北,張鈞甯就充當領隊,帶住霆鋒上演一場跑住食嘅美食之旅。 今次係二人首次合作,佢哋嘅見面方式亦都與眾不同,出名鍾意做運動嘅張鈞甯揀咗喺跳彈床嘅場館同霆鋒匯合,仲話:「你以為我會那麼輕鬆的放過你嗎?」。佢仲主動幫霆鋒安排三日豐富嘅台北行,就係瘋狂做運動,包括:跳彈床、長跑、伸展運動、爬山等等。喺跳彈床時,霆鋒跳到出晒汗,攰到一個點,最後被張鈞甯拖走;去到長跑環節時,同張鈞甯跑跑吓步嘅霆鋒突然揸住架「綿羊仔」出現,張鈞甯即刻話:「你作弊!」霆鋒解釋話:「我不跑是因為我有扁平足。」於是張鈞甯就帶咗霆鋒去做腳底按摩,按摩時,張鈞甯痛到面容扭曲、典嚟典去,坐喺隔離嘅霆鋒就一面淡定,張鈞甯忍唔住問:「你是面部神經壞了。」十分搞笑。 雖然好似由美食節目變咗運動節目,但佢哋亦都食勻台北特色美食,好似鮮奶豆花、麻吉、薑母鴨、雞油飯、三杯中卷、烤蕃薯等。一期一個故事,今次霆鋒同張鈞甯就俾咗一個驚喜屋企喺台北嘅《鋒味》90後攝影師花花,一直以嚟,花花隨團跑勻世界各地,今次一站返到屋企台北,感受特別深刻,霆鋒同張鈞甯去咗花花屋企為他製作一餐暖心料理。回憶起呢幾年同《鋒味》相伴點滴,霆鋒亦談及與年輕團隊並肩度過嘅時光,「很開心看到他們的成長」。煮飯期間,花花仲拎出呢幾年拍過嘅所有美食嘅相,每一張都充滿回憶,張鈞甯亦為花花準備咗特別驚喜,用相機記錄咗花花工作時每一個畫面,厚厚一疊相承載咗一份暖意。