謝賢嫌謝霆鋒醜 霆鋒反寸:「似你囉!」 日前,《鋒味》播出第五集,今次謝霆鋒同嘉賓內地著名演員張一山去到美食歷史源遠流長嘅順德,二人去咗當地廚師學校練習拋鑊、又去農場徒手捉雞。除咗張一山,今集霆鋒仲搵嚟兩個重磅嘉賓一齊煮飯仔俾「順德自梳女」食,佢哋就係霆鋒嘅阿爸謝賢同埋契媽汪明荃,期間兩父子不時互寸,十分搞笑。 「陳村粉」係順德最出名嘅菜,霆鋒同張一山去到當地即刻食咗個陳村粉宴,包括:炒陳村粉、陳村粉壽司、陳村粉pizza、陳村粉蒸排骨等。之後二人就去到廚師學校練習拋鑊,仲要挑戰一分鐘拋一百二十次。之後去到農場徒手捉雞亦笑料百出,當霆鋒「一堵,二攔,三扣」使出渾身解數終於捉到雞時,另一邊廂嘅張一山就唔覺意咁放走咗隻雞,呢個學廚之旅可謂「幾經波折」。 除咗食勻正宗嘅順德美食,霆鋒亦透過美食去回饋當地人-順德自梳女。為咗做出經典又簡單嘅廣東味道,霆鋒搵嚟阿爸謝賢(四哥)同契媽汪明荃(阿姐)助陣。煮餸期間,四哥同阿姐講番當年佢哋拍緊《千王之王》時霆鋒出世嘅情況,四哥話當時接到電話後,即刻除咗戲服撲去醫院,嗰吓心情又好奇又激動,第一眼見到霆鋒後,四哥竟然衝口而出:「咁醜嘅。」喺隔離聽緊「故仔」嘅霆鋒即刻話:「似你囉。」之後霆鋒又笑四哥戴超懶型,話佢其實乜都睇唔到,四哥就話:「我係唔想睇到你……」兩父子嘅互寸互動,網民勁讚好有愛。