【咁啱得咁橋?】 容祖兒搬屋遇好歌 《獨照》賈立怡為《答案之書》埋尾 早前,容祖兒推出全新國語大碟《答案之書》,今日(28日)就推出新國語歌《剛好》MV。MV由曾經獲得台北電影節最佳導演嘅陳宏一操刀,利用動畫講述兩個女仔喺唔同階段,追求自己夢想嘅過程中所面對嘅成長故事,以及喺愛情同夢想之間嘅抉擇。 講起首歌嘅製作過程,祖兒話同首歌嘅歌名一樣:「剛好」。事緣「剛好」祖兒搬屋時遇到0三年幫佢寫《獨照》嘅賈立怡;剛好佢哋兩個做咗鄰居;「剛好」已經轉咗行嘅賈立怡因為祖兒嘅一句鼓勵說話叫佢唔好放棄,再次憶起創作初心。之後喺祖兒生日當日,屋企嘅信箱就收到《剛好》嘅曲詞。其實喺信箱收到呢首歌之前,大碟《答案之書》原本只有八首歌,而且已經全部錄好,不過有同事提議係咪應該加多兩首,十首歌先係一張完整嘅大碟嘅時候,祖兒就收到呢首歌,「剛好嘅時間、剛好嘅相遇、剛好嘅心情、剛好嘅結果,希望呢張專輯能夠剛剛好係屬於每個你嘅『答案之書』!」 而喺錄呢首歌時,歌曲監製陳建麒同祖兒錄到一個段落突然靈感到,覺得呢首歌可以加入一啲輕鬆隨性嘅「啦啦」和音,於是祖兒就叫晒「剛好」嚟探班嘅工作人員入錄音室臨時配唱,一開始同事們仲以為開玩笑,估唔到係嚟真,就咁樣「剛好」完成咗即興又有趣嘅錄音經驗,同事亦為大碟劃下一個完美嘅句號,祖兒話:「2018年乜嘢時期都係剛好,雖然當中有開心不開心嘅事,也足夠令自己睇清楚,我係非常幸福嘅人,有能力去應付所有遇到嘅事,有足夠嘅智慧同能力,去解決心入面嘅問題。我知道身邊有好多愛我嘅人,一直喺我身邊俾好多好多力量我,當然我希望自己能夠愈嚟愈強大,覺得人生最大嘅成就唔係乜嘢獎項,而係可以做一個屬於自己、真正嘅自己,所以未來都係朝住呢個方向,工作之餘,努力保持一份初心。」 《剛好》Official MV youtube link: https://youtu.be/WAkvqsBMXYA