後日(20日)喺香港擺酒鍾欣潼(阿嬌)今日(18日)就同老公賴弘國喺尖沙咀進行簽紙註冊儀式。英皇集團主席楊受成博士、英皇娛樂行政總裁集團許佩斯小姐、英皇娛樂行政總裁集團營運總裁霍汶希小姐,及英皇一班藝人包括:容祖兒、古巨基、蔡卓妍、關智斌、鄭希怡同老公梁學儲都一早到場。 儀式喺晏晝近五點開始,二人宣讀完誓辭便交換結婚戒指,之後便情深一吻,期間祖兒大叫:「好嘢!錫多啖,錫唔夠喎。」錫錫後就開始簽紙儀式,英皇集團主席楊受成及賴弘國父親分別任阿嬌及賴弘國嘅証婚人;簽紙後四人合照,Mani話:「楊生,挨近啲影相啦。」楊生即刻笑說:「我驚Michael嬲呀。」及後一眾英皇藝人齊齊起哄同阿嬌講:「我唔捨得你嫁呀!」阿嬌還擊:「我好想你哋嫁呀!」祖兒再話:「嫁出去嘅水等如潑出去嘅女。」心水清嘅阿Sa就即刻篤爆,「係咪講錯嘢呀?好似係嫁出去嘅女等如潑出去嘅水喎。」全場即刻大笑。簽紙儀式完結後,一對新人就同親友影大合照。 隨後,眾人移師室內向長輩斟茶,二人首先跪地向老闆楊受成斟茶,並由祖兒客串「大妗姐」,飲過茶後,老闆就向賴弘國「訓話」:「你要好好對她(阿嬌),不好的話你就不要來香港。」十分搞笑。