俾容祖兒篤爆走數 張敬軒：「有拖冇欠。」

噚日，容祖兒出席活動時話張敬軒應承咗拎嘢出嚟俾佢義賣，點知走咗數，說時遲那時快，軒仔噚晚就即刻找數，不過係找俾fans。事緣佢之前應承過fans會唱兒歌，點知遲遲未兌現，於是fans就幫佢改咗個名叫「走數軒」。 為咗洗脫「走數軒」之名，今年軒仔開始找數，包括出碟、演唱會、拍科幻片等，噚晚（15日）軒仔就係自己社交網絡post咗段片，片段入面，DJ當奴着住條短裙仔通山跑，而軒仔就拎住隻草泥馬公仔同當奴喺山上面玩，原來軒仔翻唱經典卡通片《飄零燕》主題曲，仲同當奴拍埋MV《阿爾卑斯山的中女》，找埋條「兒歌數」。 MV製作得一絲不苟，特別喺造型方面落足心思，好似軒仔飾演嘅「彼得」同當奴飾演嘅「海迪」、無論由髮型到服裝，都同原著一模一樣。唱腔方面，軒仔一改平時靚聲見人，改為以一把卡通聲去唱，雖然聽到人想打爆個mon，不過聽真啲，其實軒仔大可以開拓埋配音市場；歌詞更顯心思，唱到中段，突然加插咗泰文同日文，音調效果出奇地夾。睇完成個MV真係令人對軒仔又愛又恨㗎。事後軒仔話：「泰文同日本係突然間諗到所以唱咗出嚟。」佢仲講笑話：「好希望可以憑呢首歌打入國際同兒歌市場。同埋走數嚟講呢，我係找得慢啲嘅，總之有拖冇欠啦。」