張敬軒《百年樹木》延續篇 網民錯重點:「熱褲寫真、條孖煙囪好正!」 今年張敬軒真係勤力到不得了,又開演唱會又拍「科幻片」又盛,歌又派咗四首,不過仲未完,嚟緊21日佢就會推出全新廣東大碟《Senses Inherited》。早前派台嘅《百年樹木》係十年前《櫻花樹下》嘅延續篇,MV搵嚟陳詠燊操刀,好多人唔係睇到眼濕濕就好心噏,勁有共鳴。填詞嘅林若寧睇完MV後靈感大爆發,即刻再寫咗《裝睡的情人》同埋《歲月靜好》兩首歌延續番《百年樹木》,呢兩首歌唔駛等到出碟日,今日就有得率先聽。 《百年樹木》MV係電車舊生聚會前後,Felix(吳肇軒飾)對芳芳(廖子妤飾)嘅感覺;延續篇《裝睡的情人》就講述舊生聚會後,芳芳老公Bob(陳智燊飾)發覺老婆仲係好掛住Felix;而《歲月靜好》就係舊生聚會後,Felix正式放低對芳芳嘅感情,發現眼前嘅Dahlia(曾樂彤飾)對自己好好,心存感激。唔駛睇畫面,齋聽都已經係「喊死之作」。軒仔亦喺自己嘅社交平台解構呢兩首歌,不過網民就將重點放喺佢隻碟嘅靚靚寫真相嗰條褲仔同佢條腿:「你條孖煙通(囪)好正 」、「我係咪眼花,熱褲寫真?」,唔知最鍾意同網民互動嘅軒仔睇到又有乜嘢回應呢?