古巨基冇啖好食 「古太話我肥咗。」 前晚(10日),古巨基於油麻地一間懷舊冰室舉行「古巨基音樂港故事-《維多利亞》新碟發佈會」,並請嚟DJ謝茜嘉擔任司儀。發佈會上基仔食住菠蘿油、飲住紅豆冰大談今次新碟的創作概念,主要是原於自己土生土長的地方,想訴說香港的故事。 為配合新關於香港地、香港故事的主題,基仔同團隊要走勻港九拍攝唱片封套,「去咗好多大家生活嘅一啲地點,譬如大排檔影、街市、金魚街、涼茶舖,係我哋成長中,或者而家大家生活中息息相關嘅地方。除咗我自己好開心可以食食食,見到好多街坊好開心、好熱情,體會到好多香港地嘅人情味。」現場亦播放了一段基仔探訪劏房住戶的短片,基仔話記錄香港,第一時間就諗起住屋問題,「四十呎嘅劏房只可以擺到張床,房門都只係可以開到四十五度,仲要住咗劏房七年,希望大家可以關心同正視一吓呢啲問題。」隨後便唱出新碟內嘅兩首歌曲《太空艙》及《亂世情侶》。 發佈會揀選喺一間懷舊冰室舉行,基仔話因為冰室好香港地,「我好鍾意呢啲格仔磚、呢啲卡位嘅冰室,所以正當我哋要搞新碟發佈會時,就搵咗呢度。而家呢種咁原裝舊式冰室買少見少,一隻手指數得晒,真係好希望可以一路保存落去。」佢仲話平時去冰室食嘢,都會嗌番啲地道嘢食,好似菠蘿油、紅豆冰,不過最近就被太太「禁食」,基仔話:「話我呢排肥番少少,因為要做唱片宣傳、稍後又要做音樂會、演唱會,所以要強烈監控我飲食。但係我而家見到古太其實喺嗰邊自己食緊嘢,仲食得好開心,等陣佢食幾多我食幾多呀!」 臨近聖誕,問基仔買咗聖誕禮物俾太太未,基仔就話未,「都好少買唔買聖誕禮物㗎啦,雖然唔係算好老,但都老夫老妻,哈哈。禮唔禮物都唔係最重要,一齊過先最緊要。」