為宣傳全新國語大碟《答案之書》,日前,容祖兒喺廣州做完校園騷後,又即刻飛咗去台北,展開24小時北高校唱。不過佢搭嗰班早機delay咗兩次,原本中午到達台北機場嘅佢,最後要到晏晝兩點先落地。落地後,祖兒即刻衝去中正紀念堂,參加「台北市立第一女子高級中學115週年校慶舞會」,着住繡有自己名同學號校服現身、再孭埋簽埋名、寫住「祝拿第一」書包嘅祖兒一上到台就話:「我是一年級!」即刻炒㷫個場。除此之外,祖兒仲將佢嘅新碟放埋入書包送俾同學,話係「福袋」,台下同學仔即刻爆笑。 北一女校慶演唱結束後,祖兒又即刻飛奔去搭高鐵,不過期間因為大塞車,到開車前一分鐘大家先上晒車,上車後,大家一邊喘氣一邊大笑,祖兒話:「沒想到第一次搭台灣高鐵是這麼驚險,緊張到都胃痛了!但真的永生難忘!」到達高雄前往高雄科技大學時,沿路經過瑞豐夜市,為食祖兒嘅順手買咗QQ球、燒粟米、可麗餅等小食。喺高雄科技大學舉行元年校慶演唱會時,祖兒除咗分享喺瑞豐夜市買嚟嘅小食,亦好感性話:「很開心這次有機會再跑校園宣傳,可以感受青春的氣息、同學的熱情,跟大家一同呼吸空氣。也覺得唱校園很high,非常喜歡與同學互動的感覺!」對於一日走兩場嘅快閃校園show,祖兒話覺得好新鮮,就其是快閃高雄三小時,同埋首次台灣高鐵初體驗,覺得特別刺激。