毛舜筠開設嘅曲奇餅店「MM+f Bakery Culture」今日喺炮台山開幕。舊年法國藍帶畢業後,毛姐就全程投入研發自家曲奇,經過年幾嘅時間終於成功兼開舖。今朝一早,毛姐媽咪、家姐、細佬一早到場支持,老公區丁平更落手落腳幫餅店做decoration。 毛姐話噚晚喺舖頭做到凌晨一點幾先走,「間舖入面每一盒餅嘅絲帶都係我綁,噚日就加埋我大女一齊綁,每綁一條絲帶,就好似一個祝福,覺得唔係淨係俾咗一啲食物人哋,仲加咗一啲心意同埋祝福喺裏面。」走嘅時候,喺樓下望到燈箱有自己張相,真係百感交集,「突然間覺得:『我啲餅面世啦!作為一個廚師,有嘢俾人食啦!』嗰種感覺好特別!好感動,望到自己個BB出世啦!因為全部嘢係我一手一腳,通常人哋做餅,或者我哋嗌人做,都係一個代言人,但我唔係,由每一塊餅,到呢間舖,我老公同我喺當中裏面有幾多嘅拗撬、幾多嘅艱辛,然後今日見到自己間舖頭,我心裏面諗:『我有我自己嘅嘢!』我唔識得形容係乜嘢感覺,我唔可以話係事業,因為演藝都係我嘅事業,呢個好似係我第二個事業,我做咗一樣嘢四十幾年啦,從來未試過做第二樣嘢,而家有我嘅餅舖,係我自己親手造嘅嘢,嗰種感覺好特別,好開心、好感動。」雖然噚晚三點先瞓落床,但毛姐今朝六點已經自動波彈起身,「我較七點鬧鐘,唔知點解,我六點就醒咗,突然間諗起呢間舖,『哎吔!我baby要出世喇!要俾大家睇吓我baby個樣呀!』興奮!真係興奮!」