「滿貫影后」惠英紅今日(27日)獲香港特區政府頒發銅紫荊星章,以表揚佢多年嚟對香港藝術文化及演藝圈傑出嘅成績同埋所作出嘅貢獻。 今早,惠英紅以一條剪裁簡約而莊重嘅綠色連身裙出席喺禮賓府舉行嘅授勳儀式。喺儀式完結後嘅慶祝酒會上,紅姐與眾多嘉賓合照包括特首林鄭月娥夫婦。講到今次授勳,紅姐話好開心,「好開心唔係喺我自己嘅電影圈嘅獎項裹面可以得到呢個榮耀,感覺係好似光宗耀祖嘅感覺,好開心。能為家人增光,兄弟姊妹都傳短訊俾我,以我為榮。」紅姐仲話授勳時不停提醒自己要莊重啲,唔好有演員嘅感覺走出嚟,「而家成日會低頭望一望個勳章,會將勳章擺喺屋企,同其他獎項擺埋一齊。」至於點樣慶祝,紅姐就話:「後日會同老闆(英皇集團主席楊受成博士)食飯,之後再同屋企人食。好多朋友請食飯,但因為最近要排舞台劇,又要番國內做騷,都會盡量出席。」