孖當奴當街出浴 繼之前張敬軒同商台DJ細So拍咗個「天才遊童2018-東京篇」後。噚日,呢個「天才遊童」系列又有新章節,今次軒仔就Donald(當奴)去咗澳洲拍攝「悉尼篇」。去到澳洲呢個陽光與海灘嘅地方,佢哋話要做個beach boy玩滑浪,軒仔更會以水着look登場𠻹。 做個beach boy之前,二人就去shopping買「泳衣」。揀好戰衣就試身,試完身後佢哋好益街坊咁走出試身室俾大家睇,由頭包到落腳嘅「水着look」將佢哋嘅美好身段表露無遺。期間阿奴仲大講有味笑話,話換衫時見到軒仔一個神秘嘅部位有個好細嘅紋身,「個『米』字嘅紋身其實人人都有。」軒仔亦不甘示弱,笑住話着住膠衣嘅阿奴係「蟻俠啲friend『矮俠』」。 去到Bondi Beach,二人《激戰》嘅「賤輝」上身,打拳膝撞頭頂籃跑沙灘爬樓梯,拍得有型嘅背後,到正式跟教練做熱身及陸上模擬滑浪動作,兩個即刻滑浪變滑稽,最搞笑就係佢哋一齊拎滑浪板,軒仔見到鏡頭影住,原本彎晒腰拎得好辛苦嘅佢哋即刻伸直條腰,軒仔仲話:「拍緊呀,型啲型啲。」鏡頭一轉,軒仔就變咗一個人頂住一塊滑浪板,係有型嘅。 終於可以實戰,只見二人不下數十次咁跌落水,玩咗兩個幾鐘,大家都出現疲態,最後軒仔成功企到起身兼維持到三秒左右,同行工作人員都忍唔住拍手兼歡呼,真係感動到喊!對於今次滑浪初體驗,軒仔話超級好玩,不過比想像中難,「除咗平衡,仲要食番個浪嘅走向,不過我呢啲天才兒童都好快上手,哈哈。」除咗滑浪,片尾仲有彩蛋,就係加插咗軒仔同當奴嘅出浴花絮,所以一定要睇到片尾,千祈唔好蝕呀。