內地選秀節目《中國好聲音》日前播出第九期,喺今期嘅七強賽中,三位導師都要揀霆鋒一隊嚟battle,雖然三打一被圍攻,但霆鋒一隊速戰速決,好快就揮低其他挑戰者,之後仲講笑咁話,咁早搞掂,都冇佢嘅事,要帶隊員去打邊爐咁話。當晚謝霆鋒一隊率先迎戰導師庾澄慶戰隊,連續battle四局,霆鋒一隊最終喺七強名額中佔得兩席。 節目一開始,霆鋒帶領住隊員唱出Beyond嘅《光輝歲月》向偶像黃家駒致敬。佢精彩嘅表演令觀眾重溫咗美好嘅光輝歲月,雖然係對手,但導師庾澄慶同李健都不約而同話:「霆鋒是香港精神的傳承。」之後喺第一輪演唱中,霆鋒一隊嘅徐暐翔與七強名額擦肩而過,賽後霆鋒喺網路上都表示惋惜:「我的天呐,怎麼可以這麼慘,差一票!」真性情表露無遺。 今期節目一共四輪比拼,霆鋒一隊選手全部出戰,最後隊劉郡格同「打包安琪」兩位選手成功晉級七強。而今場比賽中最大亮點,就係霆鋒改編咗《貝加爾湖畔+Faded》,佢將民謠加入電子音樂,大晒音樂才華,今次嘗試嘅結果令「打包安琪」以大比分獲勝,成為七強之一,就連呢就歌嘅原創者,同時亦係節目導師李健都大讚:「令人耳目一新,念念不忘。」再一次証明霆鋒嘅音樂功力。 另外,今日(24日)中秋節,《中國好聲音》亦會喺今日播出中秋晚會特輯,霆鋒會首次演唱新碟入面嘅《空》,聽《光輝歲月》唔夠喉嘅話,就要留意今晚中秋之夜嘅表演啦。