今個夏天,唔少藝人好似容祖兒、蔡卓妍、何超蓮、關智斌都潮玩wakesurf(無繩滑水)。日前,藝人衞詩雅(Michelle)同陳家樂都加入wakesurf行列,玩過一次wakesurf、游過渡海泳又係救生員又有船牌嘅Michelle仲話要挑戰家樂𠻹。 比賽好簡單,如果家樂三次內起到水、兼放手柄滑水維持十秒就贏,Michelle亦都有三次機會。Michelle先落水,第一次起水失敗,第二次起到一半水時就即刻被教練叫停,教練好無奈咁笑住話:「佢調轉咗塊板……」擺番好塊板Michelle再次成功起水,不過準備放開handle之際,就跌咗落海,呢個時候,坐喺船上嘅家樂興奮到大叫:「第二次啦,輸啦!輸啦!」吸取咗之前兩次經驗,第三次Michelle明顯醒好多,同時成功放開handle滑水,不過只係維持到五秒。 輪到家樂落水,開船兩秒,家樂已經起到水,見到呢個情形,坐喺船尾嘅Michelle心知不妙,唯有打定輸數話:「死啦,輸咗俾佢。」不過未放handle就跌落海;第二次家樂成功放開handle,兼維持到六秒;最後一次,家樂成功維持十秒勝出比賽。回程時,家樂叫Michelle到海中心大嗌「陳家樂好勁!」原來比賽開始前,二人輸賭,如果家樂三次內成功的話,Michelle就要自己揸船到海中心大叫「陳家樂好勁!」,家樂仲話:「嗌到我滿意為止先番嚟。」Michelle亦一口答應,十分搞笑。 當日除咗Wakesurf,家樂仲玩埋wakeboard,落水前,家樂就好謙咁話自己唔識跳浪,點知就俾同行同事踢爆,「之前喺陸地又話自己幾咁勁,嚟到又話唔識。」落水後,家樂都都玩得有板有眼,不過最終以一個「拜神」動作作結,喺wakesurf比賽輸咗嘅Michelle就好不經意咁話:「拜得神多自有神庇佑。」贏番場牙骹戰。