因為劇集而人氣急升嘅陳家樂最近密密吸金,成為廣告客戶搶手貨。日前佢就為大新銀行拍攝廣告,廣告入面,家樂化身唔同國家人種,包括中國人、日本人、泰國人、英國人等,大sell銀行「外幣兌換限價買賣服務」。 其中泰國人嘅造型入面,拍攝團隊特別預備咗榴槤作拍攝之用,原來家樂勁鍾意食榴槤,拍攝前一日佢啱啱喺馬拉返港,兩日一夜嘅行程入面更爭取到時間去食「榴槤放題」,仲食咗六、七款榴槤,認真擦得。雖然前一日食咗咁多,但當日完成廣告拍攝後,家樂見「道具榴槤」食得唔好嘥,喺冇任何開榴槤工具嘅情況下,即場搵膠袋袋住榴槤,然後「劈」佢落地,只係掟咗兩下,家樂就「赤手空拳」將榴槤「劈開」,講到食榴槤,家樂有唔少難忘經歷,「件事有啲核突嘅,細個試過一次過食兩個榴槤,因為太好味,好似唔識飽咁,最後食到嘔番晒出嚟,榴槤味加埋啲嘔味,可以想像得到幾咁勁,哈哈。不過自此之後我都唔夠膽食咁多,最多一個。」