日前,歌手泳兒(Vincy)到馬鞍山出席「沙田警區『半邊天』計劃開展禮」,計劃係同區內婦女組織合作,防止和及早介入家暴事件、兒童犯罪、網上情緣等騙案。 活動上,Vincy除咗唱出由張佳添作曲嘅計劃主題曲《預留位置》,對於網上情緣騙案,Vincy話而家科技發達,好多生活日常、習慣都改變,就連男女朋友,都可以通過網上認識,「所以認識一個人,最實際都係面對面直接對話。同埋老生常談一句,要帶眼識人。」Vincy自言冇遇過網上騙案,不過佢嘅社交平台,間唔時都會收到啲古靈精怪嘅inbox message,Vincy笑說:「比較普遍嘅就係問我電話號碼幾多號;另外,有一個印象特別深刻,就係佢每朝早、中午同夜晚都會同我講早晨午安同埋早抖,出event佢就會話我喺邊度見到你,又知我喺邊整頭同上落車,有時仲會send相俾我睇,對我嘅行蹤清楚過我自己,但我從來冇見過佢真身,哈哈。」聽落都有啲驚,咁有冇同男友講?Vincy就話:「我會叫埋佢過嚟一齊睇,開心share,哈哈,可能佢係比較瘋狂咗少少,但我都好多謝佢咁支持我嘅。」