許靖韻(Angela)最近可謂社交媒體嘅寵兒,8月8日,騰訊音樂娛樂集團聯手英皇娛樂為Angela於北京舉辦首場「《K歌之王》音樂尊享會」,演出現場全場爆滿。作為Angela内地首場歌友會,此次活動同時喺網上全程直播,QQ音樂、酷狗音樂、酷狗直播等四大平台合共錄得超過百萬觀眾同時收睇,成績非常理想。 歌友會開始,Angela以一身白色修身長裙登場,自彈自唱《白玫瑰》打開序幕,網友見到呢身打扮紛紛大讚Angela有陣仙氣飄出嚟。緊接其後唱出《男人KTV》國語版,Angela選唱時原來有一份用心,「國語版嘅原唱係胡彦斌老師,之前參加節目時曾經合作過,講過好希望將來同佢合唱,如果擁有一首由佢創作嘅作品就真係再好不過啦!」Angela今次可謂憑歌寄意,仲講笑叫歌迷記得網上狂tag胡彦斌,實行集氣將願望實現。 之後Angela換左套銀色閃到爆上衣加黑色漆皮裙,配合翻曲風演繹pop rock味濃嘅《Girl Friend》及自己作品《琢磨》,澎湃嘅感覺"辣慶"全場,唔少觀眾仲起哄點唱其快歌舊作《Ring Ring》,Angela笑謂當然知道大家想一睹自己舞藝,睇怕下次再公開表演都走唔甩要郁兩下。雖然最後未有跳舞,不過Angela為咗答谢大家,就翻唱《失落沙洲》同近期內地大熱歌曲《不負青春》,演繹出屬於自己嘅版本。 現場除咗北京歌迷,Angela話冇諗過會有遠至廣州、貴州等地嘅歌迷飛嚟支持自己,所以要向現場歌迷大派褔利,邀請咗五位觀眾上台比賽玩急口令,又親手送出簽名相同CD,歌迷顯得相當受落。主持人又問起Angela喜歡歌迷點稱呼自己,Angela:「其實好多稱呼都好搞笑,不過我最喜歡嘅係叫我“港姐”。」搞笑回應隨即引來網友大讚綜藝感超強! 演出最後,Angela壓軸唱出《K歌之王》,成為全晚最高潮,完騷後觀眾甚至唔肯走不停喊encore,Angela事後分享:「呢一刻係全晚最深刻,當我encore再次表演《K歌之王》,今次係全場大合唱,好開心,個種感動好難形容呀!」Angela又謂演出前一晚真係好緊張,擔心到瞓唔著。「開騷前就怕冇人嚟,過程中見到台下有同事面色凝重,又擔心係咪直播有問題,結果係因為佢俾現場氣氛感動到唔識反應。我出道咗八年,走到今日有屬於自己的歌友會,有過百萬收看率,我真係好感恩,好激動,俾大家嘅熱情融化