上星期五,內地選秀節目《中國好聲音》播出第三期,導師之一嘅謝霆鋒喺前兩期已經極速滿員、同埋進行咗激烈嘅隊內battle,所以今期佢就好輕鬆,坐定定喺導師隔離睇佢哋揀人。由於今期霆鋒比較「清閒」,所以佢同其他三位導師多咗好多交流。話就話坐埋一邊觀戰,但冇幾耐佢已經按奈不住走去「搭訕」,實行做埋其他三位導師嘅「軍師」,例如佢會推薦學員去李健嘅隊伍等等。 其後,當發現學員陳佳杏選擇演唱周杰倫嘅《聽媽媽的話》時,霆鋒就向周杰倫伸手做出搣佢面珠嘅動作,讚佢「好可愛喲」之餘,仲話自己很少喺聽到歌後想搣呢個歌手塊面,畫面勁有愛。而網民睇到佢哋呢個咁有愛嘅互動,仲幫佢哋改埋個組合名叫「鋒火倫」𠻹。除此之外,學員宿涵演唱《止戰之殤》後,霆鋒又嚟搞事,周杰倫聽到宿涵對導師們嘅讚美,就講笑咁話自己就嚟「暈倒」,呢個時候霆鋒就即刻配合,將外套當做「嘔吐袋」放喺佢面前,十分搞笑。