因為參加大陸真人選秀節目,憑強勁唱功而人氣急升嘅許靖韻(Angela),日前受邀到成都出品牌活動。活動當日,Angela着住品牌白tee,襯埋條黑色短褲,大晒白滑長腿,十分養眼。 今次行程Angela仲帶埋「見面禮」俾fans,現場演唱完整《K歌之王》。其實因為Angela喺選秀節目總決賽演唱陳奕迅嘅《K歌之王》,吸引逾千萬人次觀看,更被評為「全場最佳之一」歌手,所以活動當日,Angela再唱番呢首參加歌曲時,立即全場High爆。除此之外,fans們嘅應援物亦都好有心思,繼送大蔥、錦旗俾Angela後,今次就玩字畫,仲用「許靖韻」三個字嚟題字作詩,就連Angela忍唔住擺上去自己嘅ig story。 除咗出席活動,早前Angela亦為媒體影咗一輯Fashion相,寫真入面,Angela或以飄帶雪紡恤衫展示現代女性溫柔鎧甲,或以粉色西裝搭配印花長褲,多重格調演繹穿搭法則,營造剛柔並濟嘅獨特氣質。