而家宣傳歌曲嘅手法真係層出不窮,事隔兩年再派新歌嘅容祖兒噚晚(17日)就喺自己嘅社交平台upload咗段片宣傳全新廣東歌《心之科學》,今次佢仲玩埋自己個名𠻹。 《心之科學》係一首療癒系情歌,特別送俾失戀嘅人,所以短片以日本醫學片為拍攝概念,由容祖兒化身容醫(庸醫)同大家探討一種「新型疾病」-失戀,仲搵埋「進擊的巨人」人體圖嚟詳細解構「失戀」症狀,搞一大輪,最後梗係教大家點樣去醫病啦!冇錯啦,就係聽佢首新歌。不過最搞笑就係其中兩句對白,就係聽完佢首歌後,可以做到「冇病醫病,有病就強身健體。」好多網民睇完後都留言問呢句對白係咩玩法,亦都有人話佢講解「失戀」時嘅語氣勁似DoDo姐(鄭裕玲),大讚佢有搞笑細胞。其實除咗唱歌以外,真係可以考慮吓拍笑片,向諧星路線進發喎。 容祖兒「恐怖醫學video」facebook link: https://www.facebook.com/yungjoey/videos/1823389261061415/