謝霆霆擔任導師嘅選秀節目《中國好聲音》上星期六正式首播,四位導師謝霆鋒、周杰倫、庾澄慶和李健為節目打開序幕。之前講過,霆鋒破咗《中國好聲音》有史以嚟「最年輕導師」嘅紀錄。而喺首播呢一集,霆鋒又再次破紀錄。 喺opening入面,霆鋒型爆出場,演繹咗三首作品:《讓我一次愛個夠》、《因為愛所以愛》和《霍元甲》,當中同庾澄慶合作嘅《讓我一次愛過夠》,rock爆全場,期間穿插埋霆鋒嘅結他solo,睇到網民勁hyper,「看到謝霆鋒彈著吉他唱歌,感覺自己年輕了十幾歲!」除此之外,最令人驚喜就係四位導師一齊合作嘅《霍元甲》,期間霆鋒大晒鼓技,令唔少觀眾眼前一亮。 另外,喺「搶人」環節入面,霆鋒就創造咗有史以嚟最短「㩒掣轉身搶人」時間記錄!例如學員王朝唱《黃河謠》時,只係唱咗兩粒字,扣埋首歌嘅前奏,學員只係唱咗四秒,霆鋒就已經㩒掣轉身揀咗佢,後來呢位學員亦被其他導師爭搶,証明霆鋒的確眼光獨到;另一學員黎真吾演譯《山海》時話,搖滾唔一定要憤怒,霆鋒表示贊同;喺點評《魔鬼中的天使》嘅康樹龍時,霆鋒話:「我很喜歡你沒有太刻意地把每一個尾音抖得或修飾得很完美。」遇到鍾意嘅聲音就即刻搶人嘅方式,令霆鋒喺一期之內,眨吓眼就將六位學員收歸旗下,成為史上最快滿員嘅導師,認真快靚正!