容祖兒同張敬軒呢對「閨蜜」真係好鬼friend,舊年一齊開騷、上個月軒仔紅館演唱會頭場搵咗祖兒做嘉賓、又齊齊去日本旅行,又同一間唱片公司,雖然係咁,但原來佢哋從來都冇一首正式嘅合唱歌。等咗咁耐,最近佢哋終於正式「埋牙」! 日前,呢對閨密齊齊為麥當勞拍廣告兼合唱歌曲《Make a Beat》,造型方面,軒仔一身Dandy Style,貴氣之餘,玩味十足;而祖兒就一貫型格Dancing Queen,長腿上一對shocking pink絲襪加高踭鞋,勁搶fo。對於「首次合唱」,祖兒話等咗好耐,「等到我呢幾年都好攰啦,哈哈。今次合唱同我哋平時喺騷上面合唱嘅歌唔同,之前我哋可能都係唱情歌為主,今次呢隻《Make a Beat》係R&B曲風主導,當中有一小部份係需要英文rap,係一個幾新嘅嘗試。」 至於軒仔就負責歌曲大部份英文rap,佢笑說:「以後叫我MC Hins吖唔該。第一次要rap咁多,所以一收到歌後都下過一番苦功,咬字同節奏要配合得好好。其實同事們都未聽過我rap,首歌出咗之後,佢哋問我係咪外語歌,『咁多英文嘅?』突然之間覺得自己變咗一個西人𠻹。」