出年係容祖兒入行二十年,近日除咗忙住入紙紅館開騷,其實近年祖兒亦將事業戰線向大陸擴展,頻頻亮相大陸綜藝節目。日前,佢就上咗好友王祖藍有份主持嘅《奔跑吧》。今集《奔跑吧》更升級為《奔跑嘉年華》,而今次祖兒就回復歌手身份,除咗獻唱《小小》,仲現場演繹近日喺國內爆紅神曲《學貓叫》。 日前祖兒着住嚟自美國洛杉磯品牌Ben Taverniti Unravel Project嘅low cut裙款現身《奔跑嘉年華》,呢頭好深情咁喺度唱《小小》,被網友大讚仙氣十足,嗰頭突然曲風一轉兼即刻「變臉」,同王祖藍合唱近排喺網絡爆紅洗腦神曲《學貓叫》,一面扮cute、一面做可愛嘅貓貓動作,難怪fans們即刻紛紛留言:「沒想到你是這樣的『煮鵝(祖兒國語諧音)』。」