俄羅斯世界杯四強已經誕生,嚟緊星期日就係決賽,一向係足球狂迷嘅李克勤因為工作排到密麻麻,雖然好想全家飛去俄羅斯睇波,但最後只能夠留喺屋企睇。日前,佢就到青島為央視世界盃特備節目《最佳時刻》錄影,錄影期間,克勤大唱經典金曲《護花使者》同《紅日》,炒熱全場氣氛。除此之外,克勤透露籌備緊全新國語大碟,將會同國內眾多知名音樂人展開深度合作。 另外,近排因為國內選秀節目《創造101》而爆紅嘅歌手許靖韻(Angela)亦受邀出席《最佳時刻》錄影。呢次係Angela喺《創造101》後首次出席嘅國內大型節目,所以吸引勁多fans到青島接機。喺節目入面,Angela再次大晒唱功,唱出喺總決賽時嘅參賽歌曲《K歌之王》,將現場氣氛推向高潮,觀眾紛紛表示:「好聽到喊呀!」而節目播出當晚,Angela更憑住keyword「許靖韻央視」而登上微博熱搜榜,係威嘅!