樂壇新人曾樂彤同公司新人楊天宇(Angus)日前為服裝品牌BSX拍攝廣告,品牌以年輕人勇於突破傳統、活出自我為拍攝概念,仲同美國漫畫卡通POPEYE(大力水手)推出crossover系列,服裝設計走Hip Hop路線。 拍攝當日,二人由朝到晚拍足十粒鐘,好彩佢哋兩個喺拍攝前一早做足準備,為咗有最佳狀態,曾樂彤一早起身跑步去水腫,「跑完步就敷張雪櫃mask,再用碌面機推一推淋巴同埋飲咖啡。」至於Angus就話:「一路都有keep住做gym,同埋拍之前一晚都特別早啲瞓。」 曾樂彤話唔駛開工嘅時候,最常着就係運動裝,「我平時唔係走廣告入面嘅風格,但係客戶對我好有信心,造咗個咁新嘅造型俾我,原來其實都幾合適自己,佢哋真係好大膽,哈哈哈。」Angus就鍾意簡約style,「但係拍完呢個廣告之後又發覺原來我又幾襯呢啲衫㗎喎。以前覺得自己唔襯呢種風格,但拍完呢個廣告後,又覺得自己着得幾有型吖,哈哈。」至於拍攝趣事,Angus話本身自己係天真活潑開朗型,但喺廣告入面就要扮cool,「我好鍾意笑,但廣告入面我唔可以笑,所以我覺得幾得意,哈哈哈,同我性格好相反,對我嚟講都係一個挑戰。」 雖然大家都係新人,不過今次原來唔係第一次合作,而且佢哋仲係識於微時𠻹,「我哋第一次合作係拍吳浩康《較早前錄影》嘅mv。同埋我哋識咗好耐㗎啦,我哋中學已經識,有出嚟食過飯,所以今次拍嘢大家嘅默契都幾好。」