關智斌(Kenny)早前同張致恆合體「Boy'z」為張敬軒演唱會擔任嘉賓,一首《死性不改》真係回憶返晒嚟,仲萬人起哄叫佢開演唱會𠻹。開唔開演唱會就未知,不過做完演唱會嘉賓後,近年劇接劇嘅佢話咁快又入咗劇組啦。 13年憑劇集《追魚傳奇》而成為小生搶手貨兼收視保証嘅Kenny,舊年佢主演嘅古裝劇《拜見宮主大人》演技再次備受肯定,大結局一集喺獨家播放嘅搜狐仲達到4.7億播放率,由於劇集收視同口碑都大受好評,投資方決定添食開拍《拜見宮主大人2》。噚日(5日)劇集喺橫店開鏡,無論從導演、編劇到演員,甚至連後期製作團隊都係第一季嘅原班人馬,絕對係原汁原味製作,角色方面,除咗男主角Kenny,另外仲加入咗新血-英皇小花陳子晞(Piano),齊齊展開爆笑嘅江湖之旅。