謝霆鋒加入做導師嘅大陸選秀節目《中國新歌聲》第三季,將會喺7月13日喺浙江衛視播出,節目而家喺盲選錄影階段,四位導師揀人嘅準則都各有特色:周杰倫庾澄慶勁互動、李健理性幽默、而謝霆鋒就直覺行先。 盲選期間一位選手一開口,霆鋒就即刻㩒掣轉身,仲明確表示:「今年我要找回男生的荷爾蒙!這種不費力氣的搖滾嗓子已經很久沒有了,我要找這樣的聲音。」充份展示出自己直接嘅揀人態度。霆鋒話對待音樂從來都係認真,「如果不是誠懇的話,就會對不起我的樂迷。」其實呢種態度亦都反映出佢對節目嘅高度投入感,錄影現場最令人印象深刻,就係當另一位選手講到自己嘅青春期往事述時,同時勾起咗霆鋒細個喺加拿大獨自讀書嘅生活,「小時候在國外唸書,寄宿學校,全都是外國人,會受到不公平的對待……」庾澄慶講笑咁問:「打得過嗎?」霆鋒亦都搞笑咁話:「就算打不過,瞧不起中國人也一定要打回去!」