今年全面回歸樂壇嘅謝霆鋒,早前落實為浙江衛視《中國新歌聲》第三季擔任導師,而今日見街嘅首條宣傳片亦由霆鋒打頭陣。 近年,霆鋒型廚形象深入民心,今次條宣傳片亦選擇喺廚房拍攝。片段一開始影住霆鋒俐落地圍上圍裙,輕敲雞蛋嘅節奏,配合充滿節拍嘅切蔥聲,再加上筷子拌蛋時嘅撞擊聲,成個廚房就好似進行緊食材協奏曲。突然,導演大嗌「cut、cut、cut!」仲話霆鋒咁鍾意節奏,快啲去《中國新歌聲》做導師,於是霆鋒就即刻好型咁飛開條圍裙,再好有型咁彈起結他上嚟。鏡頭前,霆鋒飛圍裙飛得好有型,其實鏡頭後出現咗個大蝦碌。話說霆鋒飛圍裙時,可能力度太強勁,條圍裙直接飛向攝影師,仲笠住咗佢個頭,呢個時候全場即刻爆笑!霆鋒尷尬之餘,最後自己都忍唔住喪笑。估唔到平時型開嘅霆鋒都會有呢搞笑嘅一面啊。