屋企有兩狗三貓嘅泳兒(Vincy)係愛狗之人,日前,佢同英皇新人楊天宇(Angus)、大馬糖王郭鶴年細女郭燕光、上海灘創辦人鄧永鏘女兒鄧愛嘉、名媛李桂蘭兒子戴尚安及台灣富商張世駿女兒張翡玶齊齊參與由練馬師告東尼個女Antonia搞嘅「Sunset Doga」活動,同狗狗一齊做瑜珈,除咗宣揚唔好再食狗肉嘅訊息,同時亦都會籌款俾Animal Hop and Wellness用作「玉林狗肉節」拯救及醫治狗隻。 活動當日,Vincy帶咗三歲嘅Batman出嚟,第一次同狗狗做瑜珈,Vincy話:「平時佢(Batman)嘅運動淨係落吓街行吓,同埋佢係唔跑嘅,佢係好慢嘅、滋陰嘅。」一到現場,可能未熟習環境,Batman表現斯文,不過一開始做瑜珈,Batman就開始不停四圍走,搞到Vincy「滿場飛」捉狗;去到中段,其中一個動作係將狗狗放喺自己肚上面,開頭Batman都幾乖伏咗喺Vincy肚上,不過唔夠十秒Batman又想走,Vincy當然即刻捉住佢,點知Batman左擰右擰想擺脫,兩隻手係咁撥,搞到Vincy成個頭都亂晒;不過最搞笑就係活動接近尾聲時,Batman又行開咗,今次佢竟然搶「人哋」杯雪糕食!Vincy見到即刻抱起Batman兼代仔道歉,「真係唔好意思。我都話我屋企有賊㗎啦。」Vincy最後只好用零食令Batman乖乖哋坐定定。 而本身冇養開狗嘅Angus大會當日就「借」咗一隻松鼠狗仔俾佢一齊做瑜珈,一開始二人都相處得唔錯,不過冇幾耐又出現「走狗」場面,Angus來來回回捉狗不下數十次,邊行邊捉狗嘅Angus笑說:「佢真係好唔鍾意我。」 做完瑜珈,成身散晒嘅Vincy話:「因為當佢(Batman)見到隔離有靚仔、靚女、有嘢食或者有聲,佢就會完全忘記晒自己做緊嘅嘢,所以佢係比較難控制。一開始嘅時候,我直程覺得有『親子活動』嘅感覺,見到啲爸爸媽媽帶住啲『小朋友』嚟,有種好溫馨嘅感覺,但我個仔係完全不受控制,哈哈。」同樣追狗追到爆汗嘅Angus就話:「我屋企冇養狗,但我一直都好想養。同狗狗做瑜珈,最難係同狗狗同步、佢又要好乖咁坐定定去做。」Vincy仲話希望大家關注食狗肉問題,「今日呢個活動係好有意義,宣揚叫人唔好再去食狗肉,因為狗仔係我哋嘅好朋友,應該要好好照顧同好好愛護佢哋。」